Gan weithio gyda phartneriaid, gan gynnwys Heddlu Gwent, mae Cyngor Dinas Casnewydd wedi cyflwyno'r cynllun.
Bydd sefydliadau a busnesau sy'n cymryd rhan yn cefnogi pobl sy'n agored i niwed os oes angen cymorth arnynt drwy gysylltu â pherson enwebedig, cynnig cyngor neu ffonio 101 os yw'n briodol.
Mae gwasanaethau lle mae gwiriadau GDG (Gwasanaeth Datgelu a Gwahardd) eisoes ar waith eisoes wedi cofrestru ar gyfer y cynllun. Mae eraill, gan gynnwys busnesau bach, yn cael eu gwahodd i ymuno yn amodol ar wiriadau bod y ddarpariaeth yn bodloni safonau diogelu priodol.
Mae Mannau Diogel yn gynllun cenedlaethol sydd yng Nghasnewydd yn cael ei reoli gan y tîm plant anabl ond sydd ar agor i oedolion a phobl ifanc.
Gall pobl sy'n teimlo y byddent yn elwa o'r cynllun ofyn am gerdyn arbennig a fydd yn rhoi manylion pwy y gellir cysylltu â nhw os oes angen cymorth arnynt, ond gall unrhyw berson agored i niwed ofyn am help gan un o'r mannau diogel.
Cafodd Chloe hyfforddiant teithio gan y tîm a dwedodd bod y cynllun Mannau Diogel yn rhoi ymdeimlad o gymuned i bobl.
"Dwi'n meddwl bod e'n beth da, mae'n rhoi mwy o hyder i fi deithio ar ben fy hun ac yn gwneud i fi deimlo'n fwy diogel yn fy annibyniaeth. Bydd yn dod â phobl at ei gilydd ac yn rhoi lle i fynd i'r rhai sydd mewn angen heb beri straen.
Dwedodd y Cynghorydd Paul Cockeram, yr aelod cabinet dros wasanaethau cymdeithasol: "Mae adborth Chloe yn dangos bod y cynllun hwn yn bwysig i annibyniaeth pobl gan y bydd yn gwneud i bobl deimlo’n fwy saff a diogel pan fyddant allan ar eu pennau eu hunain.
"Hoffwn ddiolch i'r tîm plant anabl am eu gwaith yn codi’r cynllun ar ei draed a phawb sydd eisoes wedi gwirfoddoli i ddod yn fan diogel. Rwy’n gobeithio y bydd mwy yn ymuno.
"Byddwn yn annog unrhyw un sy'n teimlo y byddent yn elwa o'r cynllun Mannau Diogel i wneud cais am gerdyn. Mae'r cerdyn yn cynnwys manylion cyswllt brys, a gwybodaeth arall y gall gwirfoddolwyr y Mannau Diogel ei chael yn ddefnyddiol wrth ddarparu cymorth, a gellir ei gadw mewn waled neu bwrs."
Bydd y cynllun newydd yn ategu Protocol y Drindod sy'n cael ei weithredu gan Heddlu Gwent. Mae hyn yn caniatáu person ifanc neu aelod o'r teulu i gofnodi eu manylion fel y bydd yr heddlu yn deall y ffordd orau i'w cefnogi os ydynt yn ymgysylltu â nhw am unrhyw reswm.
Gall Protocol y Drindod gynorthwyo swyddogion wrth addasu eu dull yn briodol i anghenion y person ifanc y maen nhw’n gysylltiedig ag ef/hi.
I wneud cais am gerdyn neu i holi am ddod yn rhan o'r cynllun, ynweld https://www.casnewydd.gov.uk/cy/Care-Support/Mannau-Diogel.aspx e-bostiwch [email protected] neu ffoniwch 01633 414745
